"اسرار خودی"علامہ اقبال کی فلسفیانہ خیالات کی حامل فارسی مثنوی ہے یہ مثنوی 1915ء میں شائع ہوئی، اس مثنوی میں علامہ نے ایک مکمل ضابطہ حیات پیش کیا ہےجس کا محور و مرکزخودی ہے ، "اسرار خودی" میں خودی کی حقیقت و ماہیت اور قوت و صلاحیت کا بیان ہے،اور اس کی پرورش و استحکام کے لیے ایک مکمل لائحہ عمل تجویز کیا گیا ہے، روایتی مثنوی کی طرح اقبال نے اپنے افکار کی توضیح کے لیے تمثیل کا سہارا بھی لیا ہے،جس کامقصدداستان و واقعہ کے ذریعے مفہوم کو پوری طرح واضح کرنا ہے۔ اس کے علاوہ فلسفے کے ٹھوس مسائل کو شاعرانہ لطافت کے ساتھ سمونے کے لیے تخیل کی رنگینی سے بھی کام لیا گیا ہے، زیر نظر کتاب "اسرارخودی"کا منظوم اردو ترجمہ ہے ،ترجمہ حتی الامکان لفظی ہے، زیادہ تر "اسرار خودی" کے فقروں اور لفظوں سے ہی ترجمہ کیا گیا ہے تاہم ایک رکن کے اضافہ کے ساتھ دوسری بحر کا استعمال کیا گیا ہے، جس سے ایک شعر کا ترجمہ ایک ہی شعر میں کردیا گیا ہے،یہ کتاب اگرچہ مختصر ہے تاہم بڑی جامع اور اس قابل ہے کہ مسلمان اس کو پڑھ کر اپنا دستو العمل بنائیں ۔